Klubi Futbollistik Llapi ka njoftuar se hyrja në stadiumin “Zahir Pajaziti” për ndeshjen derbi ndaj FC Prishtinës do të jetë falas për të gjithë tifozët llapjanë dhe grupin Ultras Legjendat.
Vendimi është marrë nga kryesia e klubit, në shenjë falënderimi për përkrahjen e vazhdueshme që tifozët i kanë dhënë skuadrës gjatë këtij sezoni. Ndeshja zhvillohet nesër (e martë) nga ora 13:00 në Podujevë, transmeton lajmi.net.
Nga klubi kanë bërë të ditur se nuk do të ketë shitje të biletave, por do të organizohen kontrolle të rregullta sigurie në të gjitha hyrjet e stadiumit. Dyert e stadiumit do të hapen në orën 11:30, dhe tifozët janë ftuar të arrijnë më herët për të shmangur tollovitë.
FC Llapi ka kërkuar nga të gjithë të pranishmit që të respektojnë rregullat, të ruajnë rendin dhe të krijojnë një atmosferë sportive dhe pozitive, duke e mbështetur fuqishëm ekipin drejt një fitoreje të rëndësishme në derbin rajonal./lajmi.net/
