Erling Haland zbulon të vërtetën e tij në lidhje me zemërimin e dukshëm që shfaqi ndaj Pep Guardiolës pasi u zëvendësua, pavarësisht se shënoi katër gola.
Makina norvegjeze e golit u pa duke shkëmbyer fjalë me trajnerin e Mançester Sitit kur doli nga fusha në stadiumin “Etihad” pas 82 minutash, ku ai shënoi katër gola në fitoren e tyre 5-1 ndaj Uolvesit të shtunën e kaluar (4 maj). Për shumë njerëz, bezdisja e Halandit për të mos pasur mundësinë për të shënuar edhe më shumë gola, thjesht tregoi mentalitetin e 23- vjeçarit, por fituesi i “Këpucës së Artë” në Premier Ligë i dha fund diskutimit për zëvendësimin. Në një paraqitje në podkastin e “Men In Blazers”, sulmuesi zbuloi se zemërimi i tij pasi doli nga fusha nuk kishte të bënte fare me zëvendësimin me Julian Alvarezin, i cili shënoi vetëm tre minuta pasi hyri në fushë.
“Unë isha i tërbuar për shkak të diçkaje krejtësisht të ndryshme, nuk kishte asnjë lidhje me këtë”, pranoi norvegjezi. “Isha shumë i lumtur që Julian hyri dhe shënoi gjithashtu. Sigurisht që do të doja të shënoja më shumë gola, por nuk u tërbova se u zëvendësova me të. Jam i kënaqur për djalin që hyri në vendin tim për mua kjo çështje mbyllet këtu”. Pasi fitoi tripletën në sezonin e tij debutues me Sitin, një dopietë në Premier Ligë dhe Kupën FA është e mundur në sezonin e tij të dytë në Mançester, ndërsa shoku i tij i skuadrës, Xhek Grilish, foli për bashkimin që ekziston në dhomën e zhveshjes së Sitit, teksa ata ndjekin trofe të tjerë në dominimin e tyre me Pep Guardiolën.
“Kam thënë në shumë intervista se për mua, në skuadrën në të cilën jam tani, dhe veçanërisht vitin e kaluar, bashkimi që kemi është thjesht i pabesueshëm”, tha anglezi. “Me kalimin e viteve, ka pasur shumë skuadra kryesore në Premier Ligë që nuk kanë bërë atë që kemi bërë ne. Me përvojën që kemi dhe cilësinë që kemi, ne nuk dyshojmë te vetja jonë”.
ANDROKLI DRALO-PANORAMASPORT.AL
