Mediat spanjolle dhe ato franceze kanë bërë me dije se sulmuesi i krahut i Barcelonës, Osman Dembele, ka refuzuar një ofertë marramendëse nga Arabia Saudite.
Portali “Footmercato” ka zbuluar se Al-Nasr i Kristiano Ronaldos ka zbarkuar në Barcelonë për t’i prezantuar lojtarit të Barçës një kontratë vjetore prej 40 milionë eurosh për secilin nga pesë sezonet e ardhshme.
Sipas të njëjtit portal, operacioni do të ishte me një vlerë mbi 250 milionë, sepse klubi saudit mori përsipër edhe 50 milionë eurot që figurojnë në kontratën e Dembelesë si klauzolë përfundimi këtë korrik.
Por sipas “Footmercato”, lojtari do të kishte refuzuar këtë ofertë të majme sepse interesi i tij është të qëndrojë te Barça. Ai tashmë i ka shpjeguar klubit se synimi i tij është të vazhdojë, teksa palët kanë nisur bisedimet për një rinovim të mundshëm të kontratës së tij me klubin “blaugrana”.
Al-Nasr ka investuar tashmë këtë fushatë merkatoje duke afruar në ekip Seko Fofanën dhe Marselo Brozoviçin, i pari nga Lensi dhe i dyti nga Interi.
PANORAMASPORT.AL
