Bisedimet me Igli Taren dukeshin në një pikë të avancuar, por te Milani duket se ka pasur një reflektim tjetër në lidhje me rolin e drejtorit sportiv.
Shqiptari mbetet favorit për shkaqe të lidhura me përvojën dhe mungesën e një kontrate me klube të tjera, megjithatë, sipas “Tuttosport”, mund të ketë ndryshime. Kjo, sepse Xhorxho Furlani preferon Toni D’Amikon.
Nën kontratë me Atalantën deri më 30 qershor, ai përfaqëson në këto momente rrezikun e vetëm për Igli Taren. Kujtojmë se figura e drejtorit sportiv te Milani mungon zyrtarisht prej 680 ditësh dhe i fundit që e mbulonte atë rol ishte Frederik Masara, që si epror kishte Paolo Maldinin.
SITUATA E SHQIPTARIT – Pas një takim të zhvilluar në Londër mes Igli Tares, Ibrahimoviçit dhe Kardinales, u duk sikur edhe Xhorxho Furlani u pajtua me idenë e punësimit të shqiptarit. Aq sa ky i fundit dhe administratori kuqezi zhvilluan edhe një takim në fillim të kësaj jave në Romë.
U tha se do të kishte edhe një bisedë të fundit përpara se emërimi të miratohej nga Xherri Kardinale, por në orët e fundit është “ringjallur” kandidatura e D’Amikos që, për hir të Milanit, mund të tentojë shkëputjen nga Atalanta në fund të sezonit aktual.
PANORAMASPORT.AL
