Skuadra shqiptare Deçiqi i Tuzit po lufton për titull dhe Kupën e Malit të Zi.
Deçiqi është kualifikuar në gjysmëfinale të Kupës së Malit të Zi.
Futbollisti Pjetër Lulgjuraj është trim i ndeshjes, duke shënuar në minutën e 90+2 dhe i siguroi fitoren ekipit me rezultat 2:1 ndaj OFK Petrovacit, në ndeshjen që u zhvillua në fushën e OFK Titogradit.
Lulgjuraj me fanellë të kuqe në veprim
Lulgjuraj është i lumtur për golin dhe kualifikimin.
Tuzjanët synojnë për herë të tretë finalen, siç thuhet në zhargonin sportiv, e treta e vërteta, Kupa të shkojë në Tuz.
Lugjuraj ka folur për gazetën kombëtare në lidhje me fitoren e mbrëmshme në frymën e fundit.
“Kemi pas një kundërshtar shumë të fortë, në një fushë shumë të vështirë për lojë, por ne treguam vullnetin dhe besuam deri në minutat e fundit për të kaluar në gjysmëfinale”, thotë Lulgjuraj.
Pas 14 jave në kampionatin malazez, Deçiqi kryeson me 29 pikë, duke lënë pas Buduçnostin me 28, Jezero 21 pikë etj.
Deçiqi është favoritëve për të fituar edhe titullin e kampionit po ashtu edhe Kupën e Malit të Zi.
“Jemi duke treguar rezultate të mira por nuk duhet menduar se jemi më të mirët, ka shumë për të luajtur”, ka nënvizuar futbollisti.
Lulgjuraj ka premtuar maksimumin me ekip në secilën ndeshje, që me fitore dhe suksese t’i gëzojnë tifozët e flaktë të klubit.
”Unë mundem vetëm të premtoj se ekipi do të jap maksimumin deri në fund, dhe shpresojmë se do ia dalim”, ka përfunduar Lulgjuraj.
Deçiqi bëhet gati për ndeshjen e radhës në Plevla, ku ndeshet me Rudarin në kuadër të javës së 15-të.
Presidenti i Deçiqit, Pal Dreshaj, me stafin e tij, po bëjnë një punë të madhe dhe ekipi në vitet e fundit është gjithnjë në pjesën e lartë të tabelës.
