Italia do të presë nesër në mbrëmje Maqedoninë e Veriut në “Olimpiko” në ndeshjen e vlefshme për kualifikueset “EURO 2024”. Në prag të këtij dueli, trajneri i axurrëve, Luçiano Spaleti ka dalë në konferencën e zakonshme për shtyp.
“Nga tani deri nesër në mbrëmje vetëm rezultati ka rëndësi, ne duhet të shkojmë dhe ta fitojmë këtë ndeshje. Duhet të mësojmë se çfarë do të thotë të veshësh këtë fanellë. Pres që për personalitetin dhe cilësinë që ka, Jorginjo të shkojë të marrë topin. Jam i sigurt se ai nuk do të tërhiqet. E takova këto ditë dhe më bëri një përshtypje të pabesueshme me mënyrën se si arrin të lëvizë të gjithë ekipin. Është një punë e përditshme. Mund të bësh një mijë fjalime, por më pas duhet të shkosh dhe ta fitosh këtë ndeshje dhe gjithashtu të bësh një paraqitje të mirë. Sepse rezultati është rrjedhojë e performancës. Ishte bukur të kisha këtë përqafim me Totin, një kapitull emocionues në historinë time. Me të pata një nga udhëtimet më të mira në futboll. Më duhet ta falënderoj”, deklaroi Spaleti.
PANORAMASPORT.AL
