Luka Modriç refuzoi miliona nga Arabia Saudite, pasi ndihet për mrekulli te Reali i Madridit, klub ku ka fituar gjithçka dhe ka kaluar vitet më të bukura të karrierës.
Mesfushori kroat, fitues i Topit të Artë në 2018, ndodhet në vitin e fundit të kontratës. Por, 38-vjeçari nga Zadari dëshiron të vijojë të luajë në “Santiago Bernabeu”.
Në një prononcim për kanalin zyrtar të klubit spanjoll, Modriç i premton dashuri Reali të Madridit, teksa deklaron:
“Reali është gjithçka për mua.
Është pjesë e jetës sime, familjes sime dhe mënyrës sime të jetesës. Unë kam lindur në Kroaci, por kam 11 vjet këtu dhe ndihem si në shtëpinë time.
Jam mirënjohës për gjithçka që kam përjetuar në klubin më të mirë në historinë e futbollit. Përtej çmimeve dhe titujve, gjëja më e rëndësishme ka qenë dashuria e tifozëve”, shprehet Modriç.
Prej vitesh një ndër më të mirët në rolin e tij dhe një nga protagonistët kryesorë në sukseset fantastike të “Los Blancos”.
