Janë zhvilluar ndeshjet e dyta të turneut “UEFA Women’s U-17 Championship” për Grupin B4, që organizohet nga FSHF në bashkëpunim me UEFA-n. Në këtë turne marrin pjesë përfaqësueset e Shqipërisë, Uellsit, Ishujve Faroe dhe Kazakistanit, ndërsa ndeshjet luhen në stadiumin “Elbasan Arena” dhe në “Shtëpinë e Futbollit”.
Shqipëria ditën e sotme luajti ndeshjen e dytë ndaj Ishujve Faroe në “Elbasan Arena” dhe u mund me rezultatin 0-3.
Trajneri Agustin Kola e nisi me këtë formacion sfidën ndaj Ishujve Faroe: Amelia Mone (GK), Leoselda Stalaj, Isabella Kuci, Klevisa Ndoci, Stela Vata, Amelia Reci, Tiana Gjonaj, Erika Nushi, Klesta Ago (C), Emma Xhumaqi, Xhesika Ndoj.
Ndeshja nisi jo mirë për vazjat kuqezi, që pësuan gol që në minutën e tretë të takimit. Për Ishujt Faroe realizoi Eydna Dalheim. Vajzat e Kombëtares sonë u munduan të reagonin dhe u shfaqën disa herë rrezikshëm në zonën kundërshtare, por pa sukses. Pjesa e parë përfundoi 1-0, ndërsa fraksioni i dytë nisi me një ndryshim për vajzat kuqezi. Në fushën e lojës u aktivizua Gelda Kadiolli.
Shqipëria u ndëshkua sërish në minutën e 51-të . Golin e dytë për Ishujt Faroe e shënoi Bra Zakariasardottir. E njëjta futbolliste realizoi edhe golin e tretë për ekipin mik në minutën e 66-të. Deri në fundin e takimit për Shqipërinë u aktivizuan Samanta Hysa, Herta Hasaj dhe Anja Gaskova.
Sfida tjetër e grupit Uells – Kazakistan u luajt në “Shtëpinë e Futbollit” prej orës 11:00. Vajzat e Uellsit triumfuan minimalisht me rezultatin 1-0. Goli i vetëm i takimit u realizua në minutën e 77-të me Casi Gregson.
Ndeshjet e fundit të këtij turneu do të luhen më datë 30 nëntor në orën 14:00. Shqipëria do të përballet me Kazakistanin në “Elbasan Arena”, ndërsa ndeshja Ishujt Faroe – Uells do të luhet në ambientet e “Shtëpisë së Futbollit”.
Më poshtë kalendari dhe renditja e ndeshjeve kualifikuese të Grupit B4 të Europianit U-17:
Datë 24.11.2023
Kazakistan– Ishujt Faroe 1-2
Uells – Shqipëri 2-0
Datë 27.11.2023
Uells – Kazakistan 1-0
Ishujt Faroe -Shqipëri 3-0
Datë 30.11.2023
Ishujt Faroe – Uells “Shtëpia e Futbollit” ora 14:00
Shqipëri – Kazakistan “Elbasan Arena” ora 14:00
Renditja:
1. Ishujt Faroe 6 pikë
2. Uells 6 pikë
3. Kazakistan 0 pikë
4. Shqipëri 0 pikë
