Kristofer Nkunku do të jetë pjesë e skuadrës së Çelsit për herë të parë këtë sezon kur ata do të presin Shefilld Junajtidin sot, ka zbuluar trajneri Mauricio Poçetino. Sulmuesi francez u transferua nga Lajpcigu në merkaton e verës në korrik, por për shkak të një dëmtimi në gju gjatë fazës përgatitore iu nënshtrua operacionit dhe nuk ka debutuar ende me skuadrën e re.
Trajneri argjentinas konfirmoi në konferencën për shtyp se ka ardhur momenti që ai të jetë pjesë e skuadrës: “Po, ai mund të përfshihet. Ky është një lajm shumë i mirë”, tha Poçetino, i cili në sulm do të ketë një armë më shumë përveç Xheksonit dhe Brojës: “Fakti që ai mund të jetë të shtunën dhe të ndjejmë konkurrencën në skuadër është një lajm pozitiv për ne.
Ne duhet të jemi të qetë në mënyrë që të mos i vendosim të gjithë presionin mbi të. Tani ai do të zhvillohet, do të njohë Premier Ligën”.
PANORAMASPORT.AL
