Etrit Berisha do të ketë mundësinë sot që të tregojë se sa vlen, përballë një trajneri i cili thuajse e largoi nga futbolli. Empoli i portierit të Kombëtares luan kundër Torinos, ku Berisha qëndroi një vit pa luajtur për shkak të insistimit të trajnerit Ivan Juriç. Tekniku kroat vendosi t’i besonte portën serbit Milinkoviç-Saviç edhe pse Berisha bëri mirë sa herë luajti me fanellën e Torinos.
Situata më pas arriti në pikën që trajneri e nxori plotësisht jashtë planeve të skuadrës, duke mos e grumbulluar për muaj me radhë. Kalimi te Empoli ishte fundi i kalvarit të gjatë të Berishës, i cili gjeti shumë shpejt minuta në fushë, duke u rikthyer sërisht në një nga portierët më të vlerësuar në Itali. Empoli e mori fillimisht si zëvendësuesin e të riut Kaprile, por tashmë ai është kthyer në një titullar, siç ka shpjeguar vetë trajneri Andreacoli, i cili theksoi se në këtë pikë i besonte plotësisht këshillave të përgatitësit të portierëve.
“Unë bëj shpesh formacione të ndryshme, këtu mund të përfshihet edhe portieri. Por në këtë rast, unë i besoj Siçinjanos (përgatitësit e portierëve), me të cilin bie dakord mbi zgjedhjen. Berisha po rritet, e shoh, në të kaluarën e kuptoja më pak, por tani po del në pah. Nuk kemi hierarki të saktësuara”, theksoi Andreacoli.
PANORAMASPORT.AL
