Presidenti i Real Madridit të enjten njoftoi se ata e morën vendimin e Gjykatës së Drejtësisë së Bashkimit Evropian për Superligën e shkëputur “me kënaqësi të jashtëzakonshme”.
“Real Madridi e pranon vendimin e miratuar nga Gjykata e Drejtësisë së Bashkimit Evropian, organi i ngarkuar me respektimin e parimeve, vlerave dhe lirive, me kënaqësi të jashtëzakonshme”, tha Florentino Perez në një deklaratë.
“Vendimi i sotëm i gjykatës ka një rëndësi të madhe historike, duke nxjerrë në pah dy gjetje kryesore. Së pari, futbolli evropian i klubeve nuk do të jetë më monopol. Dhe së dyti, të gjitha klubet tani do të vendosin vetë se çfarë të bëjnë më pas”, tha Perez.
“Në fund të fundit, sot ka qenë një tjetër triumf për një Evropë të lirisë, për futbollin dhe tifozët e tij”, shtoi 76-vjeçari.
Më herët të enjten, gjykata vendosi se rregullat e FIFA-s dhe Bashkimit të Shoqatave Evropiane të Futbollit (UEFA) për miratimin paraprak të garave të futbollit ndërklube, si Super Liga në 2021, janë në kundërshtim me ligjin e BE-së.
Superliga evropiane fillimisht u lançua me 12 anëtarë themelues – Real Madrid Arsenal, Chelsea, Liverpool, Manchester City, Manchester United, Tottenham Hotspur, AC Milan, Inter Milan, Juventus, Atletico Madrid dhe Barcelona.
FIFA dhe UEFA kundërshtuan projektin dhe kërcënuan se do të vendosin sanksione ndaj klubeve dhe lojtarëve që mund të vendosin të marrin pjesë në Superligë. /AA
