Superliga Europiane ka nisur punën konkrete në ditët e para të vitit 2024, që të gjejë bashkëpunëtorë dhe të shtojë radhët me klube të cilat janë të gatshme t’i bashkohen projektit për të ndërtuar një kampionat paralel me ato të organizuara nga UEFA. Vendimi i Gjykatës Europiane të Drejtësisë tashmë ia bën punën më të thjeshtë organizatorëve, të cilët falë shumave marramendëse që kanë në dispozicion, po negociojnë me klube të ndryshme.
Sekretari i përgjithshëm i Superligës, Anas Loghrari, ka deklaruar për “Ouest France” se që tani ka një pjesëmarrje thuajse të sigurt të disa klubeve të cilat presin të mësojnë detajet për të hedhur firmat në kontrata.
“Kemi 20 ekipe shumë të motivuara dhe 30 të tjerë që janë thuajse të bindur. Mund ta nisim edhe nesër nëse duam”, theksoi ai, duke bërë të qartë se bisedimet kanë avancuar ndjeshëm.
Por mediat ndërkombëtare bëjnë të ditur se objektivi real i organizatorëve është që kompeticioni të nisë në shtatorin e vitit 2025, kur të kenë plotësuar edhe kuadrin e plotë ligjor nëpërmjet vendimeve që priten të dalin nga gjykata të tjera të Bashkimit Europian rreth çështjeve të marketingut dhe të drejtës së pjesëmarrjes në kompeticione paralele.
“Objektivi është nisja në shtator 2025, me ekipet më të mira të Europës dhe gjithashtu me klubet angleze. Ka klube që kanë firmosur në mënyrë private”, kanë shpjeguar burime të organizatorëve për “AS” teksa aludohet se edhe Bajern Mynih është mes pjesëmarrësve të mundshëm, edhe pse publikisht ka dalë kundër projektit.
PANORAMASPORT.AL
