Trajneri i kombëtares së Italisë, njëkohësisht kampion i Serie A me Napolin është shpallur fitues i “Pankinës së Artë” për sezonin e shkuar në vendin fqinj. Nga 61 persona që votojnë për fituesin, në garën mes trajnerëve të Serie A, Serie B Serie C dhe Serie A, Serie B dhe Serie C për femra, Spaleti grumbulloi 42 vota.
Në vend të dytë u rendit Simone Inzaghi i Interit, teksa vendin e tretë e mori Stefano Pioli i Milanit. Duke folur pas fitores së këtij trofeu, Spaleti falënderoi lojtarët e tij te skuadra e Napolit. “Falënderoj të gjithë, në radhë të parë lojtarët e mi të Napolit dhe bashkëpunëtorët e mi. Më pas dua t’ju falënderoj të gjithë ju nga të cilët kam mësuar kaq shumë gjëra.
Të marrësh “Pankinën e Artë” nga kolegë të këtij niveli do të thotë të marrësh vlerësimin e disa prej trajnerëve më të mirë në botë. Ky çmim më detyron të jem një trajner më i mirë në të ardhmen. Inter-Juve? Mund të them se do të jetë një ndeshje gjaku”, tha Spaleti pas ceremonisë së çmimit.
PANORAMASPORT.AL
