Kombëtarja shqiptare luan sot në “Friends Arena” të Solna, ndeshjen e dytë miqësore për muajin mars, teksa këtë radhë përballë ka vendasit e Suedisë. Vetëm katër ditë pas humbjes 0-3 përballë Kilit, skuadra e Silvinjos do të kërkojë që të dhurojë një tjetër imazh, pas një paraqitje që nuk ka lënë shumë mbresa si ajo me latino-amerikanët.
Tekniku Silvinjo ka theksuar se kjo është një ndeshje për të bërë teste dhe kështu ka ndodhur me takimin e sotëm, ku ka lëvizje në rreshtimin e kuqezinjve në krahasim me formacionin tip, apo edhe me ata që u provuan pak ditë më parë në stadiumin e Parmës.
Broja në vend të Manajt, Balliu në vend të Hysajt dhe Laçi në vend të Seferit janë tre lëvizjet e radhës që ka bërë trajneri në krahasim me ndeshjen e pak ditëve më parë, duke prekur çdo repart të lojës së të tijve.
FORMACIONET ZYRTARE
SUEDIA: Olsen, Kraft, Starfelt, Lindelof, Augustinson, S. Olson, Sam. Gustafson, Kulusevski, Forsberg, Isak, Nilson.
Trajner: Jon Dahl Tomason
SHQIPËRIA: Strakosha, Balliu, Gjimshiti, Mihaj, Mitaj, Ramadani, Asllani, Bajrami, Laçi, Asani, Broja.
Trajner: Silvinjo.
