Risi në listën e lojtarëve të Garet Sauthgejtit përpara ndeshjes së sotme miqësore kundër Belgjikës në “Uembli”, ndërsa nga kampi i “tre luanëve” janë tërhequr tre futbollistë.
Mbrojtësi i Mançester Junajtid, Herri Meguajër, mbrojtësi i Mançester Sitit, Kajl Uoker dhe portieri i Kristal Palasit, Sem Xhonston, janë larguar nga kampi i Anglisë për shkak të dëmtimeve. Ata janë zëvendësuar menjëherë nga portieri i Bërnlejt, Xhejms Traford dhe mbrojtësi i Mançester Sitit, Riko Ljuis, të cilët janë thërritur menjëherë nga skuadra U-21 e Anglisë për t’iu bashkuar kombëtares së parë.
Kjo është ftesa e parë për portierin 21-vjeçar, ndërkohë që Ljuis e ka bërë debutimin e tij për skuadrën e Garet Sauthgejtit në Maqedoninë e Veriut në nëntor 2023. Meguajër, Uoker dhe Xhonston janë rikthyer pranë klubeve të tyre për t’u vlerësuar dhe vijuar rikuperimin.
Romelu Lukaku pritet të aktivizohet titullar në miqësoren e sotme kundër Anglisë, pavarësisht se sulmuesi belg vjen nga një dëmtim kronik në ijë, i cili e pengoi atë që të luante në ndeshjen e Romës kundër Brajtonit në Ligën e Europës një javë më parë.
Pavarësisht dëmtimit, Lukaku u lejua t’i bashkohej kombëtares. Dhe pas konsultimit është rënë dakord që sulmuesi të luajë nga minuta e parë në “Uembli”.
PANORAMASPORT.AL
