Milani hap garën për pasuesin e Giroud, dy emra në krye të listës
Me Olivier Giroud që do të largohet drejt Shteteve të Bashkuar atë Amerikës, Milani ka nisur punën për të gjetur një tjetër sulmues që do të mbajë peshën e repartit të avancuar sezonin e ardhshëm.
Media pranë klubit kuqezi bën me dije se në listën e drejtuesve të milanezëve janë dy emra, Santiago Gimenez i Feyenoord dhe Serhout Giurassy i Stuttgartit. I pari është vetëm 23 vjeç dhe ka shënuar 21 gola në 29 ndeshje me klubin holandez, teksa kartoni i tij vlerësohet rreth 50 milionë euro.
Kuqezinjtë kanë nisur tashmë negociatat, teksa në Milano ka përfunduar babai i Gimenez, bashkë me agjentin e tij, për të takuar drejtuesit e Milanit dhe për të hedhur bazat e transferimit.
Ndërkohë paralelisht Milani mban të hapur edhe pistën që të çon te sulmuesi nga Guinea, Giurassy, i cili ka shkëlqyer këtë sezon me gjermanët e Stuttgartit.
Kartoni i 28-vjeçarit vlerësohet rreth 20-25 milionë euro, shifër kjo më e përballueshme për arkat e Milanit, megjithatë mosha nuk favorizon shumë sulmuesin e lindur në Francë.
Pikërisht për këtë arsye, prioritet mbetet Gimenez, një sulmues 23-vjeçar që mund të rezultojë në një element me mjaft vlera si për të tashmen, ashtu edhe për të ardhmen.
