Trajneri i Francës, Didier Deschamps ka nisur të mendojë për listën me emrat që do të përfaqësojnë “Gjelat” këtë verë në Europianin që zhvillohet në Gjermani. “Les Bleus”, janë një nga kombëtaret favorite për t’i shkuar deri në fund turneut teksa organika në dispozicion të Deschamps ofron alternativa luksi.
Në Euro 2024, Franca mund të ketë edhe një armë më tepër si talenti Bradley Barcola.
Paraqitjet e sulmuesit anësor me Paris Saint-Germain në këtë sezon, bëjnë që trajneri Deschamps ta marrë në konsideratë, edhe pse 21-vjeçari nuk është grumbulluar kurrë më parë me kombëtaren A, duke pasur paraqitje vetëm me ekipin U20, U21 dhe U23. Vetë Deschamps u shpreh së fundmi se Barcola po bën mirë dhe ai me stafin e tij e kanë në fokus.
“Barcola prej muajit mars ka konfirmuar shumë me paraqitjet e tij me PSG. Megjithatë, Barcola nuk është një zbulim i kohëve të fundit. Së bashku me ndihmësit e mi, e ndjekim dhe e kemi vëzhguar prej debutimit të tij me Lyonin”, u shpreh Deschamps.
