Antonio Kasano nuk ka ndërmend të ndalë sulet e tij ndaj trajnerëve në Itali dhe në epiqendër si gjithmonë kohët e fundit janë Simone Inzagi dhe Masimiliano Alegri. Edhe pse Inzagi fitoi titullin kampion me Interin, sipas Kasanos, ai është një trajner i cili ka zhgënjyer.
“Çuditërisht e bëjnë të duket si një trajner stratosferik. Por sipas meje, i duhet kërkuar llogari pasi nuk ka fituar një titull kampion, por ka humbur dy të tjerë ndaj dy skuadrave që ishin dukshëm më inferiore.
Alegri? Ka trajnerë që kanë emër në media dhe ai ka ato 4-5 miqtë që i shkojnë mbrapa dhe të cilëve u thotë çfarë duhet të shkruajnë. Vitin e kaluar bëri që Paredes të dukej si kamerier, duke aktivizuar Berreneçea.
Pastaj bëri të shkruanin keq për Di Marian, i cili gjashtë muaj më parë kishte fituar Botërorin. Po flasim për një fenomen, një lojtar finalesh i cili në këtë sezon te Benfika ka shënuar 22 gola. Ai kërkon që të marrë gjithmonë meritat dhe u kërkon gjithmonë miqve të tij që ta ndihmojnë që të qëndrojë në detyrë”, ishin fjalët e Kasanos për trajnerët.
PANORAMASPORT.AL
