Humbja 4-2 që Barcelona pësoi në derbin e Katalunjës përballë Gironas, nuk është përjetuar mirë në kampin blaugrana. Jo vetëm që kjo ndeshje ishte një derbi, dhe kur vjen puna për derbi ato kurrë nuk duhen humbur, por edhe se falë kësaj disfate ato shpallën matematikisht kampion Real Madridin, rivalin historik të katalanasve.
Atmosfera në klubin e Barcelonës është si mos më keq. Të gjithë janë të zhgënjyer, që nga koka më e lartë që është presidenti Laporta deri te stafi teknik dhe sidomos trajneri Ksavi Hernandez, që siç bëjnë me dije mediat spanjolle i ka dënuar lojtarët e tij.
Nëse fitonin takimin, trajneri spanjoll i kishte premtuar ekipit 2 ditë pushim përpara përballjes të së martës me Real Sociedad, ndërsa tani mësohet se përgatitjet kanë filluar direkt për ndeshjen duke mos i lejuar lojtarët të pushonin.
SONI SALIHI
PANORAMASPORT.AL
