Merkato e verës pritet t’i japë fund historisë së Teo Hernandez në radhët e Milanit. Në Spanjë e bëjnë fakt të kryer kalimin e tij te Bajern Mynih në verë, pasi nga bavarezët do të largohet Alfonso Dejvis.
“Mundo Deportivo” siguron se lojtari në fjalë i ka thënë “po” bavarezëve, të cilët po kërkojnë një futbollistë të niveleve më të larta për të zëvendësuar kanadezin i cili është i destinuar t’i bashkohet Real Madridit.
Bajerni ka gjetur akordin me futbollistin i cili e pëlqen si destinacion, i bindur edhe nga historia që vëllai i tij, Lukas, ka kaluar në radhët e kësaj skuadre. Sapo klubi gjerman të mbyllë diskutimet me Milanin dhe të caktojë shifrën e transferimit të Hernandez, do t’i hapë dritën e gjelbër edhe lëvizjes së Dejvis drejt Madridit.
Milani ka bërë të qartë se nuk ka lojtarë të pashitshëm dhe për ofertën e duhur, është gati të lërë të largohet çdo futbollist. Për Hernandez nuk ka interesim vetëm nga Bajern Mynih, por edhe nga Mançester Junajtid, Çelsi si dhe Al Hilal. Kjo do të thotë se bavarezët duhet të bëhen gati për një ankand të kushtueshëm për mbrojtësin francez.
PANORAMASPORT.AL
