Aventura e Milan Skriniar në PSG mund të ketë arritur në pikën e mbylljes.
Sipas L’Equipe, në fakt, klubi parisien synon të shesë qendërmbrojtësin sllovak, i cili erdhi vetëm një vit më parë si transferim i lirë pas gjashtë sezoneve te Interi. Arsyeja është e lehtë për t’u thënë: Skriniar ka një profil që nuk i përshtatet lojës së Luis Enrique, veçanërisht në lojën me top.
Nuk është rastësi që, gjatë dhe pas dëmtimit të gjatë në kyçin e këmbës që e mbajti jashtë mes janarit dhe marsit, vendin e tij në qendër të mbrojtjes e zuri në një mënyrë pothuajse plotësisht të qëndrueshme 20-vjeçari Lucas Beraldo, i cili mbërriti në janar nga San Paolo.
Skriniar, edhe pse tani është plotësisht i rikuperuar, nuk luajti asnjë minutë as në ndeshjet çerekfinale të Champions League kundër Barcelonës dhe as në ndeshjet gjysmëfinale kundër Borussia Dortmundit.
Në përgjithësi, që nga kthimi i tij ai ka startuar vetëm tri ndeshje (kundër Clermont, Lorient dhe Toulouse, të gjitha në ligë). Një shenjë e qartë se diçka nuk funksionon.
Tani klubi është në kërkim të një zgjidhjeje, por sipas L’Equipe për momentin ende nuk duket se ka rrugë konkrete për lamtumirën e tij, edhe për shkak se kontrata e tij skadon në vitin 2028 dhe përfaqësuesi i tij nuk po punon për një largim. Me pak fjalë, qëllimi i lojtarit duket se është të qëndrojë në Paris dhe të përpiqet të luajë letrat e tij sezonin e ardhshëm.
