Të shtunën në orën 21:00 në “Wembley” do të luhet finalja e edicionit 2023/2024 të Ligës së Kampioneve, dhe në fushë do të zbresin skuadrat e Dortmundit dhe Real Madridit. Në prag të kësaj sfide ka folur edhe veterani i madrilenëve Luka Modriç, i cili mund të fitojë Champions-in e gjashtë në karrierë dhe të gjitha këto, me Real Madridin.
“Ne kemi pasur gjithmonë besim në vetvete. Ne besojmë se jemi më të mirët, dhe ne e tregojmë këtë gjë në fushën e lojës. Nëse më pyesni se kush është çelësi i suksesit, mund të them, mentaliteti, pa përmendur pastaj edhe cilësitë individuale.
E di që janë një sërë faktorësh që ndikojnë por për mendimin tim, shkaku që kemi fituar kaq shumë, është pikërisht mentaliteti, ai e bën diferencën kryesore.
Është diçka e pabesueshme të arrish shifrën 6 të Ligave të Kampionëve, por ja ku jemi. Është koha që ta shijojmë momentin, dhe të shtunën të hedhim një hap të madh përpara. Të arrija të fitoja gjashtë trofe të tillë do të ishte shumë impresive.”
SONI SALIHI-PANORAMASPORT.AL
