Kroaci-Shqipëri, është përballja e humbësve të Grupit B, takim i cili do të luhet nesër në orën 15:00 në Hamburg.
Kroacia u mund në ndeshjen e parë nga Spanja me rezultat 3-0, ndërsa Shqipëria u përmbys nga Italia në shifrat 2-1. Xhemal Mustedanagiç, legjenda e Dinamos së Zagrebit nga viti 1982, e njeh futbollin shqiptar në pëllëmbë të dorës. Në Shqipëri ai zbarkoi në vitin 2009, ku ka qenë asistent i trajnerit të atëhershëm të Shqipërisë, Josip Kuzhe. Por kur Kuzhe u largua nga pankina, Mustedanagiç qëndroi, fillimisht ishte trajner i kombëtares U-17, më pas drejtor teknik i të gjitha kombëtareve dhe më pas kryeskaut. Ai punoi 12 vite në futbollin shqiptar dhe në një intervistë për “jutarnilist” ka zbërthyer kuqezinjtë përpara ndeshjes me Kroacinë, ku ai tregon se gjysmën e lojtarëve të Shqipërisë i ka kaluar nga duart e tij.
Ja shkrimi i medias kroate me trajnerin Xhemal Mustedanagiç.
-”Gjysma e këtyre lojtarëve shqiptarë që po luajnë në këtë Kampionat Europian në Gjermani janë përzgjedhur praktikisht nga unë. Meqë ra fjala, 12 vitet e mia në Shqipëri nuk kanë shanse të thyhen nga askush, do të mbeten rekord”, u shpreh në fillim Mustedanagiç. Ai thotë se ka kaluar shumë mirë në vendin e shqiponjave, ku njerëzit janë të shkëlqyer, të afrueshëm dhe ka bërë një punë të shkëlqyer, duke e ngritur futbollin atje në një nivel më të lartë. E pyesim, sigurisht se si e sheh këtë Shqipëri, që të mërkurën do të përballet me Kroacinë? -”Shqipëria është një kombëtare shumë e rrezikshme. Do ta krahasoja me Vatrenin (epiteti i kombëtares kroate) tonë të vitit 1998. Ashtu siç ne kishim një ngarkesë të madhe kombëtare atëherë, ashtu kanë edhe ata sot. Në fakt, e thashë gabim, ata kanë gjithmonë ngarkesën maksimale kombëtare, në çdo lojë që luajnë, nuk ka rëndësi nëse ka qenë miqësore apo le të themi Europian. Për ta, të luash për Kombëtaren është gjëja më e lartë që mund të përjetohet. Po ata janë njësoj si ne, Kombëtarja është e shenjtë për ta. Më parë ishin naivë taktikisht, tani janë rritur shumë”
KOHA E SHKUAR DHE NDRYSHIMI…
-”Kur erdhëm unë dhe Josip Kuzhe në vitin 2009, fushat ishin të këqija, por ata bënin patinazh, vrapuan dhe luftuan në fusha të tilla sikur jeta e tyre të varej nga stërvitjet. I thashë Kuzhes në atë kohë “do të jemi kampionë të Europës!”, sepse deri atëherë nuk kisha parë njeri të zihej e digjej si lojtarët shqiptarë në asnjë stërvitje”. Ai thotë se në ndeshjen ndaj Shqipërisë, skuadra e Daliçit duhet të jetë shumë e kujdesshme… -”Për të qenë i qartë, besoj se s’mund të na dëmtojnë. Ata ende nuk kanë shanse kundër Kroacisë, por Shqipëria mund të befasojë këdo. Ata janë një minierë klasike tokësore. Ata janë fanatikë të vërtetë. Shumë nga lojtarët e tyre luajnë në Itali, ku kanë fituar përvojë. Më parë ata ishin taktikisht naivë, tani janë në linjë taktikisht”. Para ardhjes së trajnerit Silvinjo në janar 2023, ata nuk dukeshin shumë mirë nën drejtimin e ekspertit italian Edoardo Reja. – “E vërtetë, por a e dini pse? Sepse Shqipëria luan futboll sulmues, sulmi është në gjenet e tyre, ata kanë mentalitet sulmues. Me Rejën, dhe më parë me Xhani de Biazin, loja ishte më e mbyllur, një ‘bunker. Ish-përzgjedhjet luanin me pesë lojtarë prapa, Silvinjo luan me katër, ata kanë sulmues krahu. Fitoret kundër Republikës Çeke dhe Polonisë në grupin e tyre kualifikues për Kampionatin Europian treguan se Shqipëria mund të luajë mirë dhe të jetë e fuqishme”. Çfarë pret realisht publiku shqiptar nga turneu në Gjermani, pasi në grup me Spanjën, Italinë dhe Kroacinë kanë patjetër statusin e jo favoritit? – “Ata kanë një mentalitet të tillë që mendojnë se mund të mposhtin këdo. Ata duan të mposhtin njëri-tjetrin, të sulmojnë, prandaj ishpërzgjedhësit nuk u përshtaten, edhe pse de Biazi i çoi në ‘Euro 2016’ të Francës. Publiku pret shumë prej tyre, shqiptarët janë të tillë, mendojnë se Kombëtarja e tyre mund të fitojë e dalë kampione Europe.
YJET KUQEZI
– Kur e pyet se cilët lojtarë do të veçonte si yjet kryesore të kombëtares shqiptare, ai shprehet: – “Armando Broja është ndoshta lojtari i tyre më i mirë. Ai është një sulmues që fshihet, vjedh topin dhe largohet! Ai është një sulmues shumë i rrezikshëm. Ai është jashtëzakonisht i shpejtë, me dhe pa top. Ai i vë në gjumë mbrojtësit, pastaj shkëlqen dhe godet si rrufe. Ata kanë një mbrojtje mjaft solide të drejtuar nga Berat Gjimshiti, i cili luan për Atalantën. I shkëlqyer është edhe kapiteni Elseid Hysaj, lojtar i Lacios. Ai është përgjegjës, vjen në sulm, vazhdimisht përpiqet të marrë iniciativën përpara. Më pëlqen edhe i riu Mario Mitaj, mbrojtësi i majtë i Lokomotiv Moskës. Ai më kujton më së shumti Borna Sosan tonë. Në sulm është i rrezikshëm edhe Rej Manaj nga Sivaspori turk, i cili për shembull ishte në ekipin B të Barcelonës. Nga ana tjetër hidhet jashtë Kristjan Asllani që luan tek Interi. Nuk duhet të harroj edhe Myrto Uzunin, i cili është mjaft i ngathët në kundërsulme. Mua më pëlqen edhe Ernest Muçi nga Beshiktashi, njëherë ia kam sugjeruar Dinamos, por nuk u interesua. Është një mesfushor i ngjashëm me Martin Baturinën”. Cilët janë portierët, Etrit Berisha i Empolit dhe Tomas Strakosha i Brentford? – “Berisha është portieri i parë, sepse është më me përvojë dhe tejet racional. Strakosha nuk shteron shumë, i ngjan Livakoviçit tonë. Ai është një portier vërtet i mirë”. A mund të marrë kohën e duhur Arbër Hoxha nga Dinamo? – “Mendoj se mundet. Pra, Shqipëria është vërtet e mirë, por kur vjen puna te ndeshja e radhës me Kroacinë, nuk mendoj se kanë çfarë të shpresojnë, jemi akoma më mirë. Sigurisht që duhet të jemi të kujdesshëm, por tri pikët duhet të jenë tonat” – përfundoi Xhemal Mustedanagiç.
ILIR CARA-PANORAMASPORT.AL
