Tre nga vendet e treta janë në pozita të tilla që na detyrojnë për maksimumin. Shqipëria e ka të qartë se Hungaria në Grupin A, Austria në Grupin D dhe Sllovakia në Grupin E kanë nga tri pikë, pra nëse do të duam t’i lemë pas, duhet të fitojmë sonte ndaj Spanjës.
Në raundin e dytë shkojnë 4 nga ekipet e vendeve të treta, ndërsa dy eliminohen, ndaj duhen pritur edhe rezultatet e grupeve C e F. Sllovenia ka 2 pikë dhe ndeshjen e fundit e ka me Anglinë, ndërsa Serbia ka 1 pikë dhe sfidën e fundit e ka me Danimarkën.
Çekia ka 1 pikë në Grupin F, ashtu si Gjeorgjia. Nëse sllovenët humbasin e çekët barazojnë, ne mund të përfitojmë me barazim ndaj Spanjës, gjithnjë që golaverazhin ta kemi më mirë se këta rivalë.
Kombëtarja ka një bilanc, prej 3 golash të shënuar e 4 të pësuar, sllovenët 2-2, serbët 1-2, çekët 2-3 dhe gjeorgjanët 2-4. Në golaverazh llogaritet diferenca e golave të pësuar, por edhe numri i atyre që ke shënuar. Sidoqoftë, fitorja do të na bënte shumë më tepër punë, edhe me pikët edhe me golat, por i vetmi problem është që do të jetë tepër e vështirë për t’u arritur
