Asi i Anglisë, Xhud Bellingam, i shfaqi aftësitë e tij për herë të parë me këmbët kur ishte katër vjeç, në një çerdhe të quajtur “Twinkle Toes” (Gishtat Vezullues). Lideri i “Tre luanëve” vraponte rreth sheshit me një top, duke i treguar që në atë moshë shenjat e potencialit të tij të ardhshëm në futboll.
Menaxherja krenare e çerdhes, Luiza MedBlendford, sot 54 vjeç, tha për “The Sun”: “Ai do të ketë qenë një nga më të mirët, por kjo nuk është befasi, sepse babai i tij ishte gjithashtu një futbollist vërtet i mirë. Ne jemi të gjithë krenarë për të dhe për gjithçka që ai ka arritur”. Bellingam, sot 20 vjeç, ka vazhduar të ndërtojë një reputacion në mesin e tifozëve të “Tre luanëve” si një mesfushor me “gishta vezullues”, i cili mund të kërcejë në rrugën e tij para mbrojtësve. Por gjithçka filloi pothuajse dy dekada më parë në Sturbrixh (West Midlands). Ai ishte një nga fëmijët e parë që iu bashkua çerdhes “Twinkle Toes” në qytet kur Luiza e hapi atë.
Ajo tha: “Ai ishte një nga klientët tanë të parë kur hapa çerdhen dhe më pas iu bashkua vëllai i tij Xhob. Është e mrekullueshme të shohësh se si ai është rritur dhe zhvilluar. Por kjo nuk na befason, sepse ai kishte atë aftësi natyrore dhe ishte edukuar aq mirë. Familja e tij është e bukur. I mbaj mend mirë mamanë dhe babin e tij, ata ishin gjithmonë shumë miqësorë kur i linin Xhud dhe vëllanë e tij dhe i merrnin ata”. Babai Mark, 48 vjeç, ishte një sulmues i talentuar jashtë futbollit profesionist, i cili shënoi 700 gola deri në moshën 40- vjeçare. Ai luajti për 15 klube të ndryshme dhe dikur e përshkroi veten si “jo shumë të talentuar”. Por ishte shikimi i babait të tij që frymëzoi pasionin e Xhudit për lojën, në vitet pasi ai tregoi aftësinë e tij të parë natyrore kur ishte katër vjeç në çerdhe. Mesfushori anglez tha për babanë e tij: “Unë e shikoja atë duke luajtur gjatë gjithë kohës, këtu fillova të marr atë dashuri për futbollin”.
Ndërsa u rrit në Sturbrixh, Xhud zhvilloi një aftësi të jashtëzakonshme sportive jo vetëm në fushën e futbollit, ndërsa ai mund të kishte qenë një lojtar kriketi gjithashtu. Mark Bejkër, 71 vjeç, presidenti i “Hagley Cricket Club, Worcs”, tha: “Babai i tij e solli me vete dhe ai pati disa vite duke luajtur në skuadrat tona të të rinjve. Mund të thuash se ai ishte një kriketist i lindur në natyrë që në moshë shumë të hershme. Ai ishte një lojtar shumë i mirë, veçanërisht sepse nuk kishte shumë kohë për kriket për shkak të angazhimeve të tij në futboll. Më kujtohet se ai bëri një kapje fantastike në një ndeshje për të rinjtë. Shumica e njerëzve nuk do të kishin qenë në gjendje t’i afroheshin, por ai e bëri. Ai kishte një koordinim të jashtëzakonshëm, ishte thjesht aftësi e papërpunuar natyrore. Nëse ai do të ishte fokusuar te kriketi, ai mund të kishte shkuar shumë larg në lojë. Ai është thjesht një talent i veçantë sportiv”.
Ish-polici Mark, punon si menaxher për Xhudin dhe vëllanë e tij më të vogël, 18- vjeçarin Xhob. Edhe nëna e tyre është po aq mbështetëse. Ajo u transferua në Gjermani për të jetuar me Xhud kur ai nënshkroi për Borusian e Dortmundit në 2020 për 25 milionë paund, duke e bërë atë 17-vjeçarin më të shtrenjtë ndonjëherë.
NDIKIM I MENJËHERSHËM – Ajo bëri të njëjtën gjë kur ai u transferua te Reali i Madridit për 115 milionë paund verën e kaluar. Ai pati një ndikim të menjëhershëm në La Liga dhe në nëntor theu një rekord klubi, pasi shënoi 14 gola në 15 ndeshjet e tij të para, një më shumë se legjendat e klubit Alfredo Di Stefano, i cili luajti në vitet pesëdhjetë dhe gjashtëdhjetë, dhe Kristiano Ronaldo. Luiza është e lumtur që një nga fëmijët e saj të çerdhes me kosto 79 £ dita është tani një nga futbollistët më të famshëm në planet. Çerdhja ka postuar një foto të tij në faqen e saj në “Facebook”, duke mbajtur një nga çmimet e shumta që ai ka fituar vitet e fundit me fjalët: “Fidanishtja e Kampionëve. Ne jemi shumë krenarë për ty Xhud Bellingam”. Luiza tha: “Unë nuk jam një tifoze e madhe e futbollit, por e shikoj Xhud kur luan. Kur dikush që njihni po luan, atëherë ju dëshironi ta shikoni dhe ai është shumë shpesh tani në televizor sigurisht. Është e mrekullueshme të shohësh, ai është një djalë i ri i bukur dhe meriton të gjithë suksesin e tij. Ne e duam atë”.
ANDROKLI DRALO-PANORAMASPORT.AL
