Mirlind Daku është një nga lojtarët që po përflitet për t’u bashkuar me Galatasaray në Turqi. Sulmuesi i Kombëtares shqiptare, me shumë mundësi do të largohet nga Rubin Kazan, për të nisur një aventurë të re në Superligën turke.
Por ajo ç’ka e pengon transferimin e Dakut te Galatasaray është Mauro Icardi, i cili luan në të njëjtin rol me shqiptarin. Por, gjithçka mund të ndryshojë dhe kjo falë një klubi arab, që i ka dërguar Icardit një ofertë zyrtare të parefuzueshme.
Al Qadsiah të cilët pak ditë më parë zyrtarizuan ish-mbrojtësin e Real Madrid, Nacho Fernandez, tashmë janë vënë pas Icardit. Një ofertë stratosferike me pagë rreth 25 milionë euro në sezon pritet që të tundojë argjentinasin për t’u larguar nga Europa.
Me largimin e Icardit nga Galatasaray, gjasat që Mirlind Daku të transferohej te gjigantët e Stambollit do të ishin shumë të larta, me argjentinasin që do t’i hapte rrugën këtij ‘operacioni’ të bujshëm për futbollistin e Kombëtares kuqezi.
