Shorti për sezonin 2024/25 të Superligës së Kosovës në futboll, do të tërhiqet të martën në selinë e Federatës së Futbollit të Kosovës (FFK).
Këtë e ka bërë të ditur Komisioni i Garave, duke shtuar se tërheqja e shortit do të bëhet në ceremoninë që nis në orën 13:00 dhe atë nën praninë e përfaqësuesve të klubeve dhe medieve.
ADVERTISEMENT
Sezoni i ri në elitën e futbollit kosovar do të filloj më datën 10 gusht dhe në të do të paraqiten dhjetë skuadra.
Edhe ky sezon pritet të jetë interesant me skuadrat që kanë bërë ndryshime të mëdha këtë verë dhe disa prej tyre synojnë kreun e tabelës.
Sigurisht, vëmendjen më të madhe do ta ketë Ballkani i Suharekës, ekip që është shpallur kampion në tri sezonet e fundit dhe synon ta përsërit këtë sukses edhe në sezonin e ri. Krahas titullit, Ballkani sezonin e fundit e ka fituar edhe Kupën e Kosovës.
Krahas Ballkanit, në Superligë sezonin e ri do të paraqiten edhe Llapi, Drita, Malisheva, Prishtina, Gjilani, Dukagjini, Feronikeli ‘74’, Suhareka dhe Ferizaj.
Vëmendja në sezonin e ri do të jetë edhe te Suhareka, ekip që do të debutoj në elitë pasi në sezonin e debutues në Ligën e Parë, u shpall kampion i Grupit A.
