Kur një legjendë takohet me një tjetër… Në Nju Jork, pas “bilbilit” final të Milan-Manchester City, pati hapësirë për një shkëmbim fjalësh mes Erling Haaland dhe Zlatan Ibrahimovic. Në fund të ndeshjes miqësore, të cilën kuqezinjtë e fituan 3-2, në korridoret e stadiumit “Yankee”, norvegjezi u pa mjaft i entuziazmuar teksa takohej me ish-qendërsulmuesin suedez.
Madje, dihet se Ibrahimovic përfaqëson një nga idhujt që e ka frymëzuar gjatë gjithë karrierës yllin norvegjez, pjesë e Manchester City, edhe pse tani synon ta kalojë për nga golat dhe titujt e fituar.
Haaland i dhuroi Zlatan-it një fanellë të tijën me dedikim bashkëngjitur, të cilin Ibra e lexoi me zë të lartë: “Urimet më të mira për Zlatan, një legjendë e vërtetë”.
Pak më pas, këshilltari i lartë i “RedBird” dëgjohet duke thënë, teksa i referohej Haaland-it: “Ky është brezi i ri. Ne nuk kemi nevojë për filtra”.
Më pas, duke marrë postimin e Milanit në Instagram, Ibra i dedikoi një mendim nga profili i tij agjentit të ndjerë Mino Raiola, i cili u kujdes për interesat e tyre para vdekjes së parakohshme. “Mino do të ishte krenar”, – shkroi suedezi.
