Nga zërat e merkatos te shiriti i kapitenit. Bruno Guimaraes është i lumtur dhe i karikuar në maksimum për sezonin e ri.
Mesfushori brazilian u lidh me një transferim të mundshëm te Manchester City ose Arsenali, por aventura e tij te Newcastle do të vazhdojë.
Madje më e bukur dhe me më shumë përgjegjësi se më parë. Pasi është përzgjedhur kapiteni i ri i skuadrës së drejtuar nga Eddie Howe.
Vlerësim për të cilin 26-vjeçari latin, pjesë e bardhezinjve anglezë prej janarit të 2022, ndihet krenar dhe i plotësuar.
“Jam shumë i lumtur që do të filloj një tjetër sezon me këtë klub që ka bërë kaq shumë për mua që prej ditës sime të parë këtu.
Një tjetër ëndërr e realizuar. Të jem kapiteni i Newcastle është gjithçka që kisha ëndërruar, por nuk ma kishte marrë mendja se do të ndodhte“, thekson Guimaraes.
Newcastle, që si objektiv ka zonën Champions League, e nis edicionin e ri në Premier League në shtëpi (17 gusht).
Përballë “Shenjtorëve” të Southamptonit, të cilët u rikthyen në elitë pas vetëm një sezoni në Championship.
