Humbja në shtëpi me Italinë e ka tronditur jo pak situatën te Franca. Didie Deshamp vijon të jetë në qendër të kritikave dhe sot nga Belgjikës duhet të reagojë qoftë në rezultat, ashtu edhe për sa i përket formacionit ku një nga ndryshimet mund të jetë rikthimi mes titullarëve i Markus Turamit.
Kryegolashënuesi i Serisë A me fanellën e Interit po kalon një moment të mirë forme, teksa ndryshime priten edhe në prapavijë. Lidhur me sfidën e sotme, tekniku tranpsalpin u shpreh: “Ndaj Italisë e filluam shumë mirë, duke shënuar dhe duke i bërë presion. Në pjesën e dytë ishte më e vështirë në nivel fizik, bëmë gabime që i lejuan rivalit të barazonte. Duhet të jemi më të kujdesshëm dhe nuk duhet harruar se i dhashë minuta edhe të rinjve si Olise e Kone që kanë nevojë për të njohur presionin dhe lojën tonë”.
Kritikat nga mediat dhe publiku kanë vijuar në ditët e fundit dhe Deshamp e di se po rrezikon më shumë se kurrë në një moment kur pas Europiani të dështuar iu dha ende besim.
“Kam vite në këtë profesion dhe jam mësuar me kritikat pavarësisht se më shumë kam fituar se sa kam humbur. Për fat kemi një tjetër ndeshje të rëndësishme ku mund t’i tregojmë të gjithëve se sa të fortë jemi dhe sa të merituara janë ato që thuhen për ne”, përfundoi 55 vjeçari.
PANORAMASPORT.AL
