28 tetorin e ardhshëm France Football do të japë Topin e Artë në Théâtre du Châtelet në Paris për lojtarin më të mirë në botë dhe këtë herë disa thashetheme ia japin fitoren pothuajse të sigurt Vinicius Júnior, atij që duhet të pasojë Leo Messin në garën për çmimin prestigjioz individual.
Shumë, duke përfshirë edhe protagonistë në sektorin e futbollit, kanë dalë për të shprehur mendimin e tyre se kush e meriton më shumë një njohje të tillë dhe së fundmi ka qenë Neymar Jr ai që i është bashkuar në mbështetje të bashkatdhetarit të tij.
“Sigurisht që unë do të kërkoj që ai të fitojë Topin e Artë. Këtë vit për mua nuk ka kandidat tjetër më të mirë për të fituar”, tha braziliani.
“Ai është një djalë që e meriton, sepse është një luftëtar. Ka vuajtur shumë gjatë gjithë jetës së tij, por ka tejkaluar çdo pritshmëri dhe kritikë. Është bërë idhull për të gjithë ne”.
Ylli brazilian i Realit, sipas Neymar, është favorit edhe ndaj Kylian Mbappé, i cili gjithashtu iu bashkua merengeve këtë verë: “Këtë sezon Vinicius ka qenë më i mirë se Mbappé. Ai është një lojtar që gjeneron rrezik. Nëse Vinicius ka topin, ndjen se ka rrezik”.
