Shkëndija i jep leksion futbolli Vardarit të Shkupit në javën e tetë të Ligës së Parë të Maqedonisë së Veriut. Kuqezinjtë nga Tetova e harruan shpejt disfatën e mesjavës nga Gostivari, duke e mundur rivalin historik me rezultatin e thellë 4-0.
Që në pjesën e parë futbollistët tetovarë paralajmëruan se do të fitonin thellë, pasi golat u shënuan që në fillim të ndeshjes.
E hapi serinë Trumci, që realizoi në minutën e 3-të, pastaj në të 13-tën Ibraimi për të ardhur më pas te goli i Ahmedit në të 27-tën.
Në pjesën e dytë Shkëndija menaxhoi mirë lojën, duke mos u sforcuar shumë. Në minutën e 73-të, Florent Ramadani realizoi një gol të bukur për rezultatin 4-0, që doli të jetë dhe rezultati përfundimtar.
Me këtë fitore Shkëndija përsëri ka marrë kreun e renditjes në, duke lënë pas vetes Rabotniçkin dhe Gostivarin.
Derbi tjetër u luajt në Strugë, ku dy ekipet shqiptare Struga dhe Gostivari e mbyllën ndeshjen në barazim 2-2. Struga dy herë kishte epërsi, por Gostivari arriti të barazonte. Kampioni aktual kaloi në epërsi me Kehinden, ish-sulmues i Gostivarit, në minutën e 25-të, ndërsa Gostivari barazoi me Aydogan në minutën e 36-të.
Struga riktheu epërsinë në minutën e dytë të kohës shtesë të 45 minutave të para me Compaoren, ndërsa Gostivari barazoi në të 85-tën me Simonovskin. Pikërisht kur u barazua rezultati, kishte një tollovi mes futbollistëve të të dy ekipeve, që rezultoi me ndërprerje të ndeshjes. Arbitri kryesor u detyrua të jepte 12 minuta kohë shtesë, por rezultati mbeti i pandryshuar.
Ekipi i Besës së Dobërdollit ka fituar derbin tjetër shqiptar duke e mundur Voska Sportin me rezultat minimal 1-0, por që u dhanë tri pikë shumë me vlerë. Autor i golit të vetëm ishte Remzifaik Selmani që në minutën e 11-t.
Shkupi është mundur nga Rabotniçki me rezultat 2-1, pa mundur të dalë nga kriza.
AP Brera është treguar e pamëshirshme ndaj Pelisterit, duke e mundur me rezultatin 4-0, ndërsa ndeshja e vetme ku nuk u shënua asnjë gol, ishte përballja Tiveshi – Sileksi.
