Shenjat duken të mira për Liverpulin nën drejtimin e Arne Slot, edhe nëse trajneri i ri i “Reds”-ave nuk po e merr shumë seriozisht formën e fillimit të sezonit të ekipit të tij.
Është ndoshta shumë herët për të krahasuar holandezin me të mëdhenjtë në “Anfield Road”, Jyrgen Klop, Bill Shenkli dhe Bob Peisli, por fakti është se ai ka arritur diçka që asnjë nga paraardhësit e tij nuk mundi ta bënte. Slot është trajneri i parë i Liverpulit që fiton tetë nga nëntë ndeshjet e tij të para në të gjitha kompeticionet dhe mund t’i bëjë nëntë në 10 kur skuadra e tij të udhëtojë në fushën e Kristal Palasit sot në përpjekjen e tyre për të zgjatur kryesimin në Premier Ligë. Megjithatë, ai po fokusohet vetëm në një gjë dhe i ka paralajmëruar lojtarët e tij se ndeshja para tyre është më e rëndësishme se çdo statistikë apo rekord personal.
“Ne jemi Liverpuli, lojtarët këtu janë mësuar të jenë në krye të tabelës”, tha Slot në konferencën e djeshme. “Do të ishte e çuditshme nëse një lojtar këtu e ka kokën në re. Por nëse ne nuk luajmë mirë nesër (sot), njerëzit do të thonë që na ka marrë koka erë në vend që Palasi luajti mirë. Këta lojtarë kanë përvojë për të ditur se ne kemi luajtur vetëm gjashtë ndeshje. Shumë fituan titullin dhe Champions-in këtu, kështu që për ta është mirë të jesh në krye, por nuk pres që ata të shikojnë celularin e tyre për të parë tabelën gjatë gjithë kohës.”
PANORAMASPORT.AL
