Reali i Madridit nuk gaboi në ndeshjen e shtëpisë përballë Villarrealit, duke fituar 2-0 (Golat). Ancelotti i befasoi të gjithë duke rreshtuar në formacionin titullar Kylian Mbappenë, i cili u la i lirë nga Franca për t’u rikuperuar nga një problem i vogël fizik.
Aktivizimi i ish-sulmuesit të PSG-së pritet të shkaktojë shumë polemika për faktin që “braktisi” Francën, ndërkohë që ishte në gjendje të luante.
Sa i përket takimit të “Santiago Bernabeut”, golin e parë e shënoi Valverde, që përmbylli me saktësi një skemë të “Los Blancos” në zhvillimet e një këndoreje.
Për golin e sigurisë mendoi Vinicius Junior, që e dërgoi topin në rrjetë në minutën e 73-të. Lajmi i keq për Realit ishte dëmtimi i rëndë i Carvajal, që doli me barelë nga fusha.
Reali me këtë fitore barazoi me 21 pikë Barcelonën në krye të renditjes, por “blaugranat” mund ta rikthejnë epërsinë prej tri pikësh me fitoren e mundshme ndaj Alavesit në transfertë.
