Zhoze Murinjo do të përballet sot përsëri me Mançester Junajtidin, këtë herë si trajneri i Fenerbahçes në Ligën e Europës, Megjithatë, trajneri portugez nuk i harron thumbimet e tij të zakonshme për “Djajtë e Kuq”, nga drejtimi i të cilëve u largua jo edhe aq miqësisht pas përplasjeve me drejtuesit.
BATUTAT – “Nuk jam i lumtur nëse gjërat te Mançester Junajtid nuk shkojnë mirë. Unë kam qenë i lumtur atje, kemi fituar Ligën e Europës dhe kemi siguruar një vend të dytë në Premier Ligë. I uroj gjithmonë më të mirën e mundshme”, tha fillimisht Murinjo para gazetarëve në konferencën për shtyp.
“Më duhet të them se nuk kam menduar për ata as edhe një minutë, pasi nuk kam kohë. Ndërkohë që tani është Ten Hag në drejtim. Në të vërtetë, nëse do të dënojnë Mançester Sitin, do të kishim ende mundësinë të fitonim atë kampionat. Në atë rast, shpresoj që të më paguajnë një bonus dhe të më dërgojnë një medalje”, shtoi tekniku portugez, duke iu referuar kampionatit të vitit 2018 ku ai u rendit në vendin e dytë me 20 herë kampionët e Anglisë, 19 pikë pas Mançester Sitit të Guardiolës.
RIKTHIMI – Ai la të hapur edhe mundësinë e një rikthimi në Premier Ligë. Trajneri, i cili e fitoi kompeticionin tri herë gjatë dy periudhave që drejtoi Çelsin, për herë të fundit në Angli ishte në stolin e Totenhemit, përpara se të shkarkohej në prill 2021. Ai drejtoi gjithashtu Junajtidin për 2.5 vite dhe përveç vendit të dytë të vitit 2018 fitoi edhe Kupën e Ligës dhe Ligën e Europës.
“Unë dua që Mançester Junajtid të jetë i suksesshëm. Unë u uroj të gjithëve më të mirën. Unë njoh vetëm tre apo katër futbollistë nga koha ime atje. Ju mendoni ende se jam duke luajtur blofin, por ata janë një skuadër më e mirë sesa po tregojnë rezultatet. Ka punë për të bërë atje, herët a vonë ata do të jenë të suksesshëm. Shpresoj që të jenë përpara se unë të rikthehem në Premier Ligë dhe ata të bëhen kundërshtarët e mi. Në këtë moment ata janë rivalët e mi vetëm për një ndeshje”.
ANDROKLI DRALO-PANORAMASPORT.AL
