Trajneri i Liverpool, Arne Slot, ka thënë se pret një ndeshje të vështirë kundër Arsenal në stadiumin “Emirates”, ndërsa të dyja skuadrat përgatiten për përballjen në Premier League.
Arsenal, i drejtuar nga Mikel Arteta, po përballet me mungesa të disa lojtarëve kyç, por mbetet një sfidë e madhe për ekipin e Slot.
Liverpool aktualisht kryeson Premier League me shtatë fitore nga tetë ndeshje, ndërsa Arsenal gjendet në vendin e tretë. Skuadra e Slot ka pasur gjithashtu një fillim të shkëlqyer në champions League, duke fituar të tria ndeshjet e deritanishme.
“Të gjithë e dimë se marrja e pikëve kundër konkurrentëve të tu është jetike, dhe ndonëse askush nuk e di ende se kush do të jetë kundërshtari më i madh këtë sezon, mendoj se të gjithë e dimë që Arsenali do të jetë një prej tyre“, ka thënë holandezi.
Për ndeshjen e së dielës, Liverpool do të jetë pa sulmuesin e dëmtuar Diogo Jota, ndërsa portieri Alisson Becker gjithashtu mbetet jashtë fushës.
