Nuk do të përjashtoja kurrë të bëja diçka në klub (Reali) në një moment në të ardhmen”. Këto ishin fjalët e ishmesfushorit të Realit të Madridit, Toni Kros gjatë podkast-it “Einfach mal Luppen”, të cilin ai e ka me vëllain e tij, Feliks.
Ish-lojtari i “Los Blancos”, i cili u tërhoq nga futbolli profesionist qershorin e kaluar, e bëri të qartë se nuk do ta mbyllë derën për të bashkëpunuar sërish me klubin ku kaloi dhjetë vjet të rëndësishëm të karrierës së tij. Motivi është i qartë për gjermanin kur flitet për Madridin.
“Reali i Madridit, ajo çfarë ky klub përfaqëson për mua do të mbetet përjetë i pandryshueshëm. Atje kam kaluar një etapë të gjatë të karrierës time. Ka qenë një rrugëtim i suksesshëm, me plot trofe të fituar, por njëherazi ka qenë i mbushur plot dashuri me Realin e Madridit. Gjithnjë do të jetë kështu, gjithnjë do të jem pranë Realit, kjo është e padiskutueshme. Do ta mbroj gjithnjë dhe kudo Realin, do të jem krah tij. Kjo marrëdhënie mes meje dhe këtij klubi është e veçantë”, shpjegoi Kros në podkastin e tij.
Aktualisht ish- mesfushori është i fokusuar në projektet e tij personale që janë gjithashtu të lidhura me Madridin.
“Tani për tani jam tërësisht i përqendruar në projektet që kam në mendje, por duke parë marrëdhënien time me Realin e Madridit, nuk do ta përjashtoja se në të ardhmen do të mund të bëja diçka me këtë klub”, komentoi Kros.
Kros sqaroi se për momentin nuk është diçka në planin afatshkurtër dhe as ai nuk e ka të qartë se cili do të ishte roli i tij. Megjithatë, ai deklaroi se nuk e përjashton mundësinë e rilidhjes me klubin në një moment.
“Të shfaqem tani në ambientet publike të klubit… gjëja e parë që do të thoja është jo, pavarësisht se sa afër ndihem. Por nuk po them që nuk do të bëj më diçka ose nuk do të kem ndonjë marrëdhënie me Realin gjatë gjithë jetës sime, sigurisht që nuk do ta përjashtoja. Nuk e di se në çfarë roli, apo nëse klubi mund ta imagjinonte apo jo, por nuk do ta përjashtoja që ta shihja veten përsëri në një farë mënyre në Madrid te Reali”, përfundoi gjermani.
LEDJO SEFERKOLLI-PANORAMASPORT.AL
