Në kulmin e një krize të rëndë dhe të papritur sportive që po përjeton Manchester City, një lajm që ka dalë së fundmi po shkakton të qeshura, edhe pse përfshin një vepër penale dhe mundësinë që një prej lojtarëve të trajnuar nga Pep Guardiola të përfundojë në burg.
Sipas Gazetës Zyrtare të Kantonit Vaud të datës 25 tetor, Erling Haaland nuk ka paguar një gjobë prej 60 frangash zvicerane (rreth 64.50 euro) dhe mund të përballet me 24 orë burg.
Arsyeja për këtë gjobë ende nuk është bërë publike, por dihet që Haaland kalon shumë kohë në Zvicër, pasi babai i tij, Alf-Inge Haaland, jeton në Andermatt që nga viti 2023.
Ka gjasa që shkelja të jetë një tejkalim shpejtësie. Ky lajm është befasues, duke marrë parasysh si madhësinë e gjobës, ashtu edhe pagën e lartë të sulmuesit. Nëse Haaland nuk e paguan gjobën, ai mund të arrestohet sapo të hyjë në territorin zviceran.
