Niklas Bendtner ka qenë një emër i cili edhe në vitet kur luante futboll, bënte gjithmonë më shumë bujë me ngjarjet jashtë fushe teksa njihej me nofkën “Lordi”. Ish-sulmuesi danez, i cili në karrierën e tij ka luajtur me klube të njohur si Arsenali, Volfsburgu e Juventusi, është bërë protagonist edhe këtë radhë i një ngjarje që nuk ka lidhej me futbollin, duke qenë viktimë e një sulmi të pazakontë me thikë.
Të mërkurën e kaluar, ai ka qenë duke ecur në rrugët e Nju Jorkut në praninë e dy shokëve kur një person i është afruar me vrap dhe i ka goditur me thikë. Një kamera sigurie tregon Bendtner dhe shokët e tij duke ecur e pak çaste më vonë pas tyre vrapon një person, i cili largohet po me vrap në drejtimin nga kishte ardhur.
Sipas mediave ndërkombëtare, një nga miqtë e Bendtner ka pësuar çarje në fytyrë, vesh dhe shpinë dhe është dërguar për trajtim në spital, ndërsa ish-futbollisti ia ka hedhur pa lëndime. Autori ishte larguar, por më pas ishte kapur nga policia, i denoncuar nga e ëma e cila kishte parë të birin 25-vjeçar në lajme.
SHIH VIDEON
Bendtner konfirmoi për mediat daneze si ishte pikërisht ai personi në video. “Nuk kam komente për të bërë. Por mund të konfirmoj që jam unë në atë video. Është e vështirë t’i shmangesh kësaj situate”, tha ai.
PANORAMASPORT.AL
