Pol Arnau përjetoi një mbrëmje të jashtëzakonshme, pasi, gjatë ndeshjes mes Logronesit dhe Gironas, ai u thirr për të mbrojtur portën, pavarësisht se është një mbrojtës i djathtë.
Logrones, një skuadër që militon në Segunda RFEF, divizioni i katërt spanjoll, arriti një sukses të jashtëzakonshëm, duke eliminuar Gironën me penallti dhe shumë nga meritat i shkojnë Pol Arnau.
Futbollisti i ri, djali i ish-portierit Francesc Arnau (portier historik i Barcelonës dhe Malagas, i cili kreu vetëvrasje në vitin 2021), ka treguar se ka të njëjtin pasion për futbollin si babai i tij. Me Logrones, ai po jeton një ëndërr në Copa del Rey.
Vetëm 19 vjeç, Arnau kishte shënuar golin vendimtar në raundin e kaluar kundër Eibar, duke i dhënë skuadrës së tij kualifikimin në raundin tjetër pas debutimit të tij në ekipin e parë. Në ndeshjen kundër Gironas, fati i rezervoi një rol të papritur.
Pas dëmtimit të portierit titullar Kike Royo, Logroñés kishte shfrytëzuar të gjashtë zëvendësimet e disponueshme dhe Arnau u thirr për të zënë vendin e tij në portë. Ashtu si babai i tij, i cili kishte bërë histori mes shtyllave, Pol shkroi faqen e tij të paharrueshme, duke pritur penalltinë e Abel Gómez, duke i dhënë kështu Logroñésit kualifikimin e bujshëm.
