Interi i Simone Inzaghit ka siguruar një vend në çerekfinalet e Kupës së Italisë falë fitores 2-0 ndaj Udineses. Arnautovic zhbllokoi ndeshjen, më pas Asllani e mbylli lojën në pjesën e parë me një gol shumë të bukur direkt nga goditja e këndit.
Duke nisur ndeshjen si titullar në vend të Calhanoglu, Asllani shijoi kënaqësinë e shënimit.
“Nuk më kishte ndodhur kurrë të shënoja gol direkt nga kornja. Ajo që kishte më shumë rëndësi ishte fitorja, ne jemi të lumtur sepse po japim vazhdimësi rezultatesh dhe po ecim përpara gjithnjë e më mirë.
E rëndësishme është grupi, i cili është fantastik, ka kimi të madhe mes nesh në dhomat e zhveshjes, ne dalim shpesh bashkë dhe kjo krijon alkiminë e cila më pas çon edhe në rezultate, duhet të falënderoj edhe Arnautovicin për mbështetjen e tij, ai është një nga ata që i ndihmon gjithmonë të rinjtë dhe është themelor për grupin”, ka thënë mesfushori shqiptar pas ndeshjes.
