Nga Reali bëjnë me dije se do të ankohen për kartonin e kuq të Viniciusit
Trajneri i Real Madridit, Carlo Ancelotti, ka thënë se skuadra do të ankohet për kartonin e kuq të Vinicius Juniorit, pasi braziliani ishte përjashtuar nga loja të premten mbrëma, në fitoren ndaj Valencias.
Madrilenët ndeshjen e mbetur të xhiros së 12-të në La Liga, e fituan me shumë mund 2:1 ndaj Valencias në udhëtim.
Golin e fitores madje e shënuan në minutën e 95-të, nëpërmjet Jude Bellinghamit.
Sulmuesi i krahut, braziliani Vinicius, u përjashtua nga loja në minutën e 79-të.
Ai e shtyu portierin Stole Dimitrievski, ndërsa kartoni i kuq u dha pas rishikimit të situatës në VAR.
“Ne do të ankohemi. Ne mendojmë se nuk ishte për karton të kuq. Aty duhej të ndëshkoheshin të dy me kartonë të verdhë”, ka thënë Ancelotti të premten pas ndeshjes në konferencën për shtyp.
Pas 19 ndeshjeve, Real Madridi ka 43 pikë, dy më shumë se Atletico Madridi që e ka një ndeshje më pak të luajtur.
