Manchester United pati nevojë për një super Amad Diallo për të fituar me përmbysje kundër Southampton-it në duelin e javës së 21-të të kampionatit anglez.
“Djajtë e Kuq” e nisën ndeshjen në “Old Trafford” me një rast të rrezikshëm të Garnacho-s, por në vijim të pjesës së parë jo vetëm që nuk ishin më agresivë, por u befasuan nga loja e miqve, të cilët në 2-3 raste u ndalën nga një super Onana.
Portieri i Manchester United u dorëzua, sidoqoftë, në fundin e pjesës së parë pas një autogoli të shokut të tij të skuadrës, Ugarte.
Pjesa e dytë nisi me një tjetër rast të mirë të Southampton-it, mirëpo në vazhdim emocionet në të dyja portat ishin të pakta.
Për t’u dhënë pak buzëqeshje tifozëve vendas në “Old Trafford” mendoi talenti Amad Diallo. Anësori i djathtë ofensiv barazoi shifrat në minutën e 83-të përmes një këmbënguljeje personale. Pastaj, në minutën e 90-të, pas një tjetër këmbënguljeje të tij nga e djathta dhe një kombinimi me Eriksen-in, Diallo shënoi golin e përmbysjes, duke e çuar rezultatin në 2-1.
Në minutën e 94-t, Diallo vulosi fitoren me golin e tretë, pas një gabimi të prapavijës mike dhe agresivitetit të tij.
Pas këtij suksesi, Manchester United ngjitet në vendin e 12-të me 26 pikë. /vizionplus.tv
