Bledi Shkëmbi është prezantuar sot përballë gazetarëve në vigjilje të ndeshjes së radhës së Tiranës, e cila viziton Ballshin për tu përballur me Bylisin e Nevil Dedes.
Tekniku korçar u rikthye pak ditë më parë te Tirana për të vazhduar atë që nisi në fillim e këtij sezoni. “Nuk është se ishte shumë e vështirë për të më bindur, ajo që unë kam bindje është skuadra, pavarësisht momentit të vështirë që po kalon, por jam i bindur që do i kalojë vështirësitë. Luajmë me skuadrën që është më në formë e momentit, sfidë vendimtare por që kampionati nuk mbaron me këtë ndeshje, kemi ndeshje të tjera”, tha Shkëmbi.
Sipas trajnerit që bardheblutë të marrin rrezultat në këtë përballje direkte u duhet edhe shumë fat. “Shpresoj të kemi fatin pavarësisht mungesave që kemi. Haxhiu, Gjumsi, Abel, Ismajli mungojnë, por nuk duhet të justifikohemi pasi nuk kemi kohë. Këtë skuadër tani e shikoj më të plotësuar në ato reparte që unë e mendoja, por dhe afrimet duan kohë, por që ne nuk e kemi, do mundohemi të bëjmë mirë”, komentoi Shkëmbi.
Ndërsa i pyetur nëse do të ndikonin muajt që qëndroi larg ekipit, ai u përgjigj: “Unë jam i bindur për aq sa e njoh skuadrën, këtë herë gjërat janë më të qetë, më ndryshe, besoj që do e kalojmë. Nuk kam naj pishman me vete me mënyrën si kemi punuar, kemi bërë gabime, por nuk duam ti përsërisim”.
