Struga Trim Lum ka pësuar disfatë minimale përballë gjigandëve rus të Rubin Kazan në ndeshjen e e tretë kontrolluese të zhvilluar sot në Belek të Turqisë.
1:0 doli të jetë rezultati përfundimtarë i këtij takimi të përcjellë me shi gjatë gjithë ndeshjes, me një gol të shënuar që në minutën e parë.
Një kurth jo mirë i vendosur nga ana e mbrojtësve të skuadrës së Struga Trim Lum në krahun e djathtë, u mundësoi futbollistëve të skuadrës ruse të shënojnë golin e epërsisë vetëm pas 22 sekondave lojë.
Kampionët e vendit tentuan të rikthehen shpejtë në lojë, ndërsa shumë pranë për të bërë një gjë të tillë, ishte sulmuesi Lanre Kehinde, kur në minutën e 18-të doli i vetmuar para portierit kundërshtarë, mirëpo pa arritur të shënojë.
Sulmuesi nigerian u shfaq i rrezikshëm edhe në aksionin tonë të rradhës, këtë herë pas një harkimi në zonë të Pape Fall, mirëpo goditjen e tij me kokë pa shumë probleme e ndali portieri i Rubin Kazan, Staver.
Ky i fundit ishte me fat edhe në minutën e 42, kjo pasi goditja e Stevan Jevtoskit nga distanca përfundoi për disa centimetra sipër portës së tij.
Pjesën e dytë trajneri Qatip Osmani, vendosi ta nis me dy ndryshime.
Në vend të portierit Vedran Qoshevski, në lojë inkukadroi Hristijan Stevkovskin, ndërsa vendin e Stefan Jevtoskit, e zuri Besmir Bojku.
Vetëm pas dy minutave lojë në pjesën e dytë, Lanre Kehinde edhe njëherë tjetër tentoi për të shënuar me kokë, mirëpo pa arritur finalizimin.
Në minutën e 65-të, Osmani u vendos edhe për 6 zëvendësime të tjera, kur në lojë u inkuadruan, Ristevski, Maleski, Compaore, Spirovski, Hamza dhe Tairi.
Inkuadrimi i tyre në lojë solli një futboll më dinamik dhe më të shpejtë, mirëpo nuk solli ndryshim të rezultatit.
Në fund disfatë minimale dhe e para e pësuar në Antalya të Turqisë për Struga Trim Lum, skuadër kjo që të hënën do të zhvillojë edhe ndeshjen e katërt kontrolluese në tokën turke kundër skuadrës së FC Kyzhylzhar nga Kazakistani.
