Trajneri i Manchester United, Ruben Amorim, paralajmëroi se “të gjithë po luftojnë për të mbajtur vendin e punës”.
Rezultatet me hope dhe vendi i 13-të në Premier League ka bërë që “djajtë e kuq” të jenë shumë larg pritshmërisë edhe pasi ndryshuan trajner.
“Ne po luftojmë për vendin tonë të punës deri në verë. Unë jam i fokusuar vetëm në këto ndeshje që kemi, të fokusuar vetëm te lojtarët tanë për momentin. E dija që kur zgjodha këtë profesion se do të përballesha me rrezikun e rezultateve dhe e dija që kur erdha këtu”, tha Amorim.
“Pashë kalendarin, pashë ekipin dhe kuptova se vendimi im për të ndryshuar gjithçka, për të marrë këto vendime të vështira në mes të sezonit, pa nënshkrime të reja, është një rrezik për çdo trajner. Por që nga dita e parë, me rezultate të mira apo të këqija, e kam të qartë se çfarë dua të bëj dhe i marr këto rreziqe sepse në fund mendoj se do të shpërblehet”, shtoi trajneri portugez.
“Unë nuk jam naiv. E kam thënë shumë herë që ky është një sport rezultatesh dhe jemi në një situatë të vështirë. Ajo që unë ndiej është se klubi po merr kohën e tij. Ne e dimë urgjencën e ekipit për momentin, por mendoj se të gjithë këtu nuk duan të bëjnë të njëjtat gabime që kemi bërë në të kaluarën”, tha Amorim.
“Duhet të përmirësojmë lojtarët që kemi, të fitojmë disa ndeshje dhe më pas në verë do të shohim. Jemi shumë të kujdesshëm me transferimet sepse kemi bërë disa gabime në të kaluarën. Është një moment që është e vështirë të ndryshosh gjërat në disa ndeshje. Do të jetë kështu deri në fund të sezonit”, përfundoi Amorim.
