Pavarësisht deklaratave të Zlatan Ibrahimoviç se bisedimet për rinovimin me Teo Hernandez janë në rrugën e duhur, në Itali duken të sigurt se këta janë muajt e fundit të anësorit francez në radhët e kuqezinjve.
Kur atij i kanë mbëtur vetëm një vit e katër muaj nga përfundimi i kontratës, palët nuk kanë gjetur akordin ekonomik dhe qartësisht kanë parësore objektiva të ndryshëm mes tyre. Ndaj pas 5 vitesh e gjysmë bashkë, Teo Hernandez po fillon të kërkojë rreth e rrotull për një sistemim të ri.
Në fakt, Milani ia kishte gjetur në janar, kur pranoi një ofertë të ndjeshme ekonomike prej 54 milionë eurosh nga Komo, por lojtari e refuzoi duke theksuar se kërkonte të luante për objektiva më të rëndësishëm dhe jo për mbijetesën apo mesin e tabelës në Serinë A.
Një mesazh i qartë nga të dy palët se tashmë “martesa” është drejt fundit, me futbollistin që në verë do u japë lamtumirën kuqezinjve e ndoshta përfundimisht Serisë A. Një lamtumirë për të tentuar një aventurë në Angli, nga ku klube të ndryshme kanë shfaqur interes vazhdimisht për anësorin e majtë i cili në moshën 27-vjeçare, ka ende shumë vite para në nivele konkurruese.
PANORAMASPORT.AL
