Janë mbyllur dy ndeshjet e fundit të javës së 26-të në ABISSNET SUPERIORE. Në “Niko Dovana”, Teuta fitoi 2-1 ndaj Tiranës.
Bardheblutë kaluan të parët në avantazh me golin e dyshimtë të Jarmouni, që fillimisht u anullua nga arbitri anësor, por pas ndërhyrjes së VAR, u quajt i rregullt. Teuta barazoi një minutë më pas me Simeu, i cili përfitoi edhe nga pasiguria e portierit Selmani dhe dërgoi topin me kokë në rrjetë.
Goli i fitores për “Djemtë e Detit” do të vinte në minutën e 87-të, ku Matias Lloci u tregua i saktë nga pika e bardhë e penalltisë. Pas kësaj fitoreje, Teuta parakalon Tiranen dhe renditet e teta me 27 pikë, ndërsa bardheblutë renditen një vend më poshtë me një pikë më pak.
Në sfidën tjetër, Skënderbeu fitoi me rezultatin minimal në Korçë 1-0 ndaj kampionit në fuqi, Egnatias. Goli i vetëm i takimit u shënua nga Ardit Nikaj në minutën e 60-të me penallti. Skënderbeu vazhdon të renditet i fundit me 23 pikë, ndërsa Engatnia në krye me 48 pikë.
