Nuk është një sekret që marrëdhënia mes Realit të Madridit dhe shefit të La Ligës nuk është e mirë. Arbitrimi është kthyer në një problem i madh në futbollin iberik. Klubi madrilen ankohet për gabimet e “xhaketave të zeza” ndërsa Havier Tebas u del në krah pasi në të kundërt i gjithë sistemi që drejton nuk do të ishte më i besueshëm në sytë e publikut.
Havier Tebas shfrytëzoi intervistën më të fundit të dhënë për “The Objective” për të sulmuar 15 herë kampionët e Europës duke i konsideruar si një klub qaraman. “Në javët e fundit arbitrat janë kontestuar shumë. Federata nuk po shikon për asnjë zgjidhje. Por Real Madrid TV dhe Real Madrid po hedhin në treg teori apo histori me shumë të pavërteta duke vendosur në pikëpyetje të gjithë lëvizjen futbollistike spanjolle. Të gjitha klubet ankohen, por vetëm Reali i Madridit u jep të tjera nuanca akuzave duke i nxjerrë edhe më në pah. Është një histori agresive dhe e manipuluar. Unë njoh shumë tifozë të Realit, të cilët nuk janë dakord me atë çfarë publikon klubi i tyre, i cili është kthyer në një klub qaraman. Ato qajnë pas çdo takimi dhe besojnë se gjithçka është faj i një konspiracioni”, tha Havier Tebas.
