Liria e Prizrenit ka reaguar për dhunën që shkaktuan tifozët e saj sot ndaj futbollistëve të Vëllaznimit, në kuadër të javës së 16-të të Ligës së Parë të Kosovës në futboll, Grupi A.
Liria shënoi fitore me rezultat 1:0 ndaj Vëllaznimit.
“Klubi ynë ka ndjekur me vëmendje reagimet e KF Vëllaznimi dhe të akterëve të tjerë sportivë lidhur me ngjarjet e fundit.
Duke parë deklaratat e tyre, kemi disa pyetje të domosdoshme:
Ku ishte reagimi juaj pas ngjarjeve në Malishevë gjatë ndeshjes së parë mes dy klubeve?
Pse nuk dënuat aktet e dhunës kur tifozët dhe lojtarët tuaj sulmuan stafin tonë?
Pse nuk i cilësuat si “kriminelë”, ashtu siç bëtë sot?
Dëshirojmë të theksojmë qartë se nuk ka pasur asnjë tendencë apo qëllim për sulm ndaj klubit kundërshtar. Gjithçka që ndodhi ishte rezultat i tensioneve mes dy tifozërive, duke marrë parasysh edhe provokimet dhe incidentet e shpeshta të kohëve të fundit, duke filluar nga ngjarja në Malishevë e më tutje, deri sot në “Përparim Thaçi”.
Ne e dënojmë çdo akt dhune, pa asnjë hezitim. Por drejtësia duhet të jetë e barabartë për të gjithë. Nuk mund të pranojmë standarde të dyfishta kur flasim për ndëshkimin e akteve të dhunshme.
Presim që të gjithë të mbajnë përgjegjësi për veprimet e tyre dhe të trajtohen me të njëjtën drejtësi, pa dallim”, reagon FC Liria.
